و ظني فيك ربي جميل :)

رأيي ان الواحد عشان يعرف دينه بجد، البداية مش انه يعرف الحلال و الحرام و قواعد الفقه و حفظ القرآن، رأيي ان عشان اعرف ديني بجد الخطوة الاولي لازم تكون اني اعرف ربي :) (ده رأي شخصي مش اكتر)

عشان كده، بعد ما تابعت سلسلة "بأسمك نحيا"، طلعت برسايل صغيرة كتبتها عندي عشان اعيش بيهم

تعلمت ان الله هو:

الرحمن الرحيم: في كل حاجة دور علي رحمة ربنا، و خاصة في المصايب، اعرف ان رحمته دايما موجوده، دور علي عوض ربنا هتلاقيه :)

المجيب: كان في مرة مجموعة من الناس رايحين يصلوا صلاة استسقاء "عشان المطر ينزل"، كلهم كانوا رايحين عادي، بس واحد فيهم كان رايح و واخد المظلة معاه، هو ده اليقين اللي المفروض يبقي عندنا و احنا بندعي :)

قال الله تعالى: "وَقَالَ رَبُّكُمُ ادْعُونِي أَسْتَجِبْ لَكُمْ"                                                                                           

 محطلهاش شرط، و محطش واسطة بينا و بينه سبحانه و تعالي :) 

القريب: قال تعالي "وَنَحْنُ أَقْرَبُ إِلَيْهِ مِنْ حَبْلِ الْوَرِيد"، اما بنناجي ربنا، مش بنحتاج نشرح و نفسر و نوجد اعذار، هو عارف كل حاجة! مش هيفهمك غلط، مش هيظلمك، و دايما و في آى وقت هيسمعلك... لو عشنا بالاسم ده قوي صعب اننا نحتاج لحد نشكيله و نحكيله،  هنحتاج لمين و احنا معانا القريب :)

الشكور: متستهونش بأي حاجة خير تعملها مهما تكون صغيره، لو انت نسيت و الناس نست ربك الشكور مش بينسي، و هيشكرك عليها،  اعمل الخير و ارميه البحر عشان ربك سمي نفسه الشكور :)

علي كل حاجة لازم نتعود نشكر ربنا، عشان هو هيشكرنا علي شكرنا ليه و هيزودنا، قال تعالي" لَئِن شَكَرْتُمْ لأَزِيدَنَّكُم"ْ

حاجة كمان، اشكر الناس علي جمايلهم، خلي عندك وفاء، و اوعي تكون ناكر للجميل، قال صلي الله عليه و سلم " لا يشكر الله من لا يشكر الناس"

الودود: بص للدنيا بنظرة جديدة، شوف الالوان، الزهور، المناظر الطبيعية، انواع الطعام المختلفة اللي بنحبها... كل حاجة فيها ابداع من الله و جمال في الارض. هو ربنا خلق كل ده ليه؟ ربنا خلقه عشان احنا نستمتع بيه و نمتع حواسنا بخلق الله، في كل حاجة جميلة افتكر ان ربنا خلقها عشان يودك :) فهو الودود سبحانه :)

الجبار: مع المظلوم علي الظالم، مش هيضيع حقك، و هيجبر بخاطرك... اوعي تظلم حد :)

الوكيل: توكل علي الله و متخافش من المستقبل، توكل علي الله و هو مش هيضيعك، توكل علي الله و اسعي، لأن ربنا بيحب السعي.. :)

الرزاق: كل حاجة ليها طريق حلال و طريق حرام، انت اللي بتختار الطريق اللي توصلها بيه، سواء هيوديك الجنة او النار هي هي نفس الحاجة اللي هتوصلها في الدنيا، لأن الرزق مكتوب!

قال تعالي "وَفِي السَّمَاءِ رِزْقُكُمْ وَمَا تُوعَدُونَ * فَوَرَبِّ السَّمَاءِ وَاْلأَرْضِ إِنَّهُ لَحَقٌّ مِثْلَ مَا أَنَّكُمْ تَنطِقُونَ"

الهادي: كل يوم، 17 مرة بنقول "اهدنا الصراط المستقيم"، ممكن كتير مننا مش بيحسوا باللي بيقولوه ده، لو حسناه، و بجد تخيلنا نفسنا ماشيين علي صراط الذين انعم الله عليهم، الانبياء و الصالحين، ممكن خشوعنا في الصلاة يقوي قوي :)

ربنا هدانا بالفطرة للاسلام من قبل ما نتولد، و هدانا تاني الحمدلله و فضلنا مسلمين، نحمد ربنا بقي علي هدايته ليينا و منعلقش ذنوبنا علي شماعة (مهو اصل لسة ربنا مهدانيش و خلاني اصلي)  عشان دي مش حجة لترك الصلاة (ولا لأي معصية طبعا)... ربنا يهدينا جميعا :)

الفتاح: "الله يفتح عليك" من احلي الدعوات اللي ممكن تدعيها لحد، ربنا يفتح علينا في يومنا، و يفتحلنا آى باب مقفول يكون في الخير لينا :)

الكريم: يا انسان، ربنا اكرمك و فضلك حتي علي الملايكة، فازاي ترضي تذل نفسك بالمعاصي؟ عيش كريم الخلق، كريم النفس، عشان لما تقف قدام ربنا تقوله "يا رب انا مذلتش نفسي بعد ما كرمتني"، اوعي تذل نفسك قدام نفسك :)

الغفور: مش معناها بس ان ربنا يسامحك علي الذنب، لأ ده كمان بيستر عليك، يستر عليك في الدنيا و في الآخرة عشان تكون قدام الناس محترم، مهما كبر ذنبك، طالما استغفرت الله...

اوعي يفوت يوم منغير ما نستغفر ربنا "وَمَا كَانَ اللَّهُ مُعَذِّبَهُمْ وَهُمْ يَسْتَغْفِرُونَ"

و في حاجة تانية كمان، سامح الناس و استر عليهم عشان ربنا يستر عليك، اوعي تفضح حد، و اوعي برده تفضح نفسك... افتكر قول صلي الله عليه و سلم " كُلُّ أُمَّتِي مُعَافًى إِلَّا الْمُجَاهِرِينَ وَإِنَّ مِنْ الْمُجَاهَرَةِ أَنْ يَعْمَلَ الرَّجُلُ بِاللَّيْلِ عَمَلاً ثُمَّ يُصْبِحَ وَقَدْ سَتَرَهُ اللَّهُ عَلَيْهِ فَيَقُولَ يَا فُلَانُ عَمِلْتُ الْبَارِحَةَ كَذَا وَكَذَا وَقَدْ بَاتَ يَسْتُرُهُ رَبُّهُ وَيُصْبِحُ يَكْشِفُ سِتْرَ اللَّهِ عَنْهُ

" اوعي تمشي فرحان بالمعصية و فاكرها هتخليك كول، استغفر ربنا عشان يسامحك و يستر عليك :)

العزيز: اوعي تذل نفسك لحد، اطلب الحاجة بعزة نفس، لأنك عبد العزيز. مترضاش لنفسك تتذل لبني آدم و انت عبد العزيز، و برده اوعي، اياك تذل حد :)

الحق: ربنا سمي نفسه الحق، هيقف جنب الحق، و هيظهر الحق و هينصر الحق، ياللي علي الحق متخافش :)

....... طبعا كل الحاجات دي ولا حاجة بالنسبة لعظمة ربنا و جلاله، بس ده اللي ربنا قدرني بمعرفته، يا رب اكون افدتكوا :)